505
=S=> Gen 40,1 His ita gestis , accidit ut peccarent pincerna regis Aegypti et pistor domino suo .
=S=> Gen 40,2 Iratusque pharao contra duos eunuchos , praepositum pincernarum et praepositum pistorum ,
=S=> Gen 40,3 misit eos in carcerem principis satellitum , in quo erat vinctus et Ioseph .
=S=> Gen 40,4 Et princeps satellitum tradidit eos Ioseph , qui ministrabat eis . Aliquantulum temporis illi in custodia tenebantur .
=S=> Gen 40,5 Videruntque ambo somnium nocte una iuxta interpretationem congruam sibi .
=S=> Gen 40,6 Ad quos cum introisset Ioseph mane et vidisset eos tristes ,
=S=> Gen 40,7 sciscitatus est eos dicens : “ Cur tristior est hodie solito facies vestra ? ” .
=S=> Gen 40,8 Qui responderunt : “ Somnium vidimus , et non est qui interpretetur nobis ” . Dixitque ad eos Ioseph : “ Numquid non Dei est interpretatio ? Referte mihi quid videritis ” .
=S=> Gen 40,9 Narravit praepositus pincernarum somnium suum : “ Videbam coram me vitem ,
=S=> Gen 40,10 in qua erant tres propagines , crescere paulatim in gemmas et post flores uvas maturescere ;
=S=> Gen 40,11 calicemque pharaonis in manu mea . Tuli ergo uvas et expressi in calicem , quem tenebam , et tradidi poculum pharaoni ” .
=S=> Gen 40,12 Respondit Ioseph : “ Haec est interpretatio somnii : tres propagines , tres adhuc dies sunt ,
=S=> Gen 40,13 post quos elevabit pharao caput tuum et restituet te in gradum pristinum ; dabisque ei calicem iuxta officium tuum , sicut facere ante consueveras .
=S=> Gen 40,14 Tantum memento mei , cum tibi bene fuerit , et facias mecum misericordiam , ut suggeras pharaoni , ut educat me de isto carcere ;
=S=> Gen 40,15 quia furto sublatus sum de terra Hebraeorum et hic innocens in lacum missus sum ” .
=S=> Gen 40,16 Videns pistorum magister quod somnium in bonum dissolvisset , ait : “ Et ego vidi somnium , quod tria canistra farinae haberem super caput meum ;
=S=> Gen 40,17 et in uno canistro , quod erat excelsius , portare me ex omnibus cibis pharaonis , qui fiunt arte pistoria , avesque comedere eos ” .
=S=> Gen 40,18 Respondit Ioseph : “ Haec est interpretatio somnii : tria canistra , tres adhuc dies sunt ,
=S=> Gen 40,19 post quos auferet pharao caput tuum ac suspendet te in patibulo , et comedent volucres carnes tuas ” .
=S=> Gen 40,20 Exinde dies tertius natalicius pharaonis erat ; qui faciens grande convivium pueris suis elevavit caput magistri pincernarum et caput pistorum principis in medio puerorum suorum ;
=S=> Gen 40,21 restituitque alterum in locum suum , ut porrigeret ei poculum ,
=S=> Gen 40,22 alterum suspendit in patibulo , sicut interpretatus erat eis Ioseph .
=S=> Gen 40,23 Attamen praepositus pincernarum non est recordatus Ioseph , sed oblitus est interpretis sui .
|
